የዳላሱ ቅዱስ ሚካኤል ቤተ ክርስቲያን በዲያቆን አንዱአለም መሪነት ወደ ስደተኛው ሲኖዶስ እየሔደ ነው!

‹ከሥጋው ጾመኞች ነን ከመረቁ አውጡልን› በሚል አቋም የኢትዮጵያውንም ሆነ ስደተኛ ሲኖዶስ ነኝ ብሎ አሜሪካ የተቀመጠውን አንቀበልም ፤ ነገር ግን የምንከተለው የኢትዮጵያ ኦርቶዶክስ ተዋህዶ ቤተ ክርስቲያንን እምነትና ሥርዓት ነው ፤ በማለት የዳላስ ቅዱስ ሚካኤል ቤተ ክርስቲያን ለበርካታ ዓመታት በዚህ አቋሙ መቆየቱ ይታወቃል፡፡ይሁን እንጂ የቤተ ክርስቲያኑ የቀድሞ አስተዳደር ቦርድ አቋሙን እንደገና በማሻሻል ከጥቂት ዓመታት በፊት የኢትዮጵያ ኦርቶዶክስ ተዋሕዶ ቤተ ክርስቲያን ሲኖዶስ አይሰደድም፤ሲኖዶስና መንበሩ ያለው አዲስ አበባ ኢትዮጵያ ነው፡፡ሕጋዊው ፓትርያርክም አባ ጳውሎስ ናቸው፡፡ የዳላስ ቅዱስ ሚካኤል ቤተ ክርስቲያንም የኢትዮጵያውን ሲኖዶስ ሕጋዊነቱን ያምናል፤ ይቀበላል ፡፡ ነገር ግን አባ ጳውሎስ ከቤተ ክርስቲያኒቱ ይልቅ በማይመለከታቸውና ሃይማኖቱ በማይፈቅድላቸው ሁኔታ የገዢው ፓርቲ ፖለቲካዊ ተግባር ወኪልና አስፈጻሚ ሆነው እያገለገሉ በመሆናቸው አስተዳደራቸውን አንቀበልም ፤ በማለት የቆየ አስተዳደር ነበር፡፡

ይሁን እንጂ በአዲስ የአስተዳደር ቦርድ አባላት ምርጫ ወቅት የተሐድሶ መንፈስን የሚደግፉና አንዳንድ የዘር አድሎ ችግር ያለባቸው ግለሰቦች ተቀላቅለው በመግባታችውና አስተዳደሩን በመቆጣጠራቸው የነበረውን አንጻራዊ ሰላም በማደፍረስ የቤተክርስቲያኑን ችግር አባብሰውታል፡፡ በቤተ ክርስቲያኑ የሚያገለግሉ ካህናት ቦርዱ ለሚፈጽመው ስህተትና ጥፋት ድጋፍ የማይሠጡና በአውደ ምሕረቱ ላይ ቦርዱን የማያመሰግኑ ከሆነ ፤ በምትኩም ተሐድሶን የሚነቅፉና ጠበቅ ያለ የሃይማኖትና የሥርዓተ ቤተክርስቲያንን ትምህርቶች ከሕይወት ጋር አያይዘው የሚያስተምሩ ከሆነ የቦርዱ ጥርስ ውስጥ ይገባሉ፡፡አሊያም በቀይ ካርድ ይባረራሉ፡፡

እውነተኛ ካህናትን በማሰቃየትና ከሥራ በማፈናቀል ፤የሕዝብንም ድምጽ በማፈንና በመናቅ ፤ ፖሊስ በመቅጠርና ምዕመናንን በማስደብደብ ያለማጋነን ከዓለም አብያተ ክርስቲያናት የዳላሱን ቅዱስ ሚካኤል የአስተዳደር ቦርድን የሚያህል የለም ፡፡ ይህም የቅርብ ጊዜ ትዝታና ዓለም ሁሉ በቪደዮ መስኮት ያየው ሐቅ በመሆኑ የሚረሳ አይደለም፡፡ የዚህን ቤተ ክርስቲያን አስተዳደር ቦርድ ኢሃይማኖታዊና ኢክርስቲያናዊ ተግባር በመረዳት በሃይመኖታቸውና አቋማቸው ጠንካራ የነበሩ ካህናትና የደብሩ ሰንበት ተማዎች ለቀው መውጣት ቦርዱን እንዳሻው እንዲያደርግ ረድቶታል ፡፡

በካናዳ ስደተኛው ሲኖዶስ ቤተ ክርስቲያን ሥር የነበረውን ደላላ (ለቃሉ አጠቃቀም ይቅርታ) ዲያቆን አንዱአለምን ቀጠረ፡፡ እርሱም አስተዳደሩን በውዳሴ ከንቱ ሰማይ እያደረሰ ቦርዱም ያለዲያቆን አንዱአለም አዋቂ ሰው የለም እያለ ሁለቱም እርስ በእርሳቸው እየተፎጋገሩ በቤተ ክርስቲያኑ ውስጥ ትልቁን የቁማር ጫወታ ተያይዘውታል፡፡

ዲያቆን አንዱ አለም ለልጆች አስተማሪ ተብሎ የተቀጠረ ይሁን እንጂ በዋነኛት እየሠራው ያለው የዳለስ ቅዱስ ሚካኤልን ቤተ ክርስቲያን አስተዳደር የተሐድሶ መንፈስ ስሜትን ማርካትና ቤተ ክርስቲያኑን በስደተኛ ሲኖዶስ ሥር እንዲሆን ማድረግ ነው፡፡ ለዚህም

1.የመጀመሪያ መንገድ ጠረጋ ሥራውን ከቤተ ክርስቲያኑ አስተዳደር ቦርድ መካከል ሁለት የቦርድ አባላት ከሦስት ወራት በፊት በካናዳ ካልግሪ ከተማ በተደረገው የስደተኛው ሲኖዶስ ዓመታዊ ስብሰባ ላይ በምስጢር ተኝተው በቅድመ ጉዳዮች ላይ እንዲነጋገሩ ሁኔታዎችንን በማመቻቸት ከፍተኛ ሚናን ተጫውቷል፡፡ ይህ ተግባር በዲያቆን አንዶአለምና በጥቂት ቦርድ አባላት መካከል የተያዘና ጥያቄ እንኳ ቢነሣ ማስተባበያ ለመስጠት የተዘጋጀለት ጉዳይ በመሆኑ አንዳንዶቹ የቦርድ አባላትም ለጉዳዩ ባዕዳን መሆናቸው ታውቋል፡፡

2.ከሌሎች መሰል ጓደኞቹ ጋር በፕሮቴስታንታዊ አስተምሕሮው ተከሶ በኢትዮጵያ ኦርቶዶክስ ተዋህዶ ቤተ ክርስቲያን ቅዱስ ሲኖዶስ በተሠየመ የሊቃውንት ጉባዔ ጉዳዩ በመረጃ ቀርቦ ጥፋተኝነቱ የተረጋገጠበትንና እራሱም ጥፋቱን ያመነውን ተሐድሶ መምህር ልዑለ ቃልን ጉባኤ አዘጋጅቶ በዳላስ ሚካኤል ቤተ ክርስቲያን መጋበዙ ዲያቆን አንዱ አለም ለሃይማኖቱ መጠበቅ ግዴለሽና የሚሠራው ለሆዱና ለገንዘብ ብቻ መሆኑን በግልጽ የሚያሳይ ከመሆኑም በላይ ቤተ ክርስቲያኒቱን ወደ ስደተኛው ሲኖዶስ ለመውሰደ ሥራ መጀመሩን የሚያሳይ ነው፡፡

3.ነፍሶቻቸውን ይማረውና ብጹዕ አቡነ መቃሬዎስ የሊቃውንት ጉባኤ ሰብሳቢ ፤ መጋቤ ብሉይ ሠይፈ የጉባኤው ጸሐፊ ሆነው አሁንም በሕይወት ባሉት ታላላቅ አባቶች በእነ ሊቀ ካህናት ክንፈ ገብርኤልና ሌሎችም ሊቃውንት አባቶች ፊት በጉባዔ ቀርቦ ሲጠየቅ ከድንጋጤው የተነሣ ላብ አስጥሞት መናገር እስኪያቅተው ድረስ ሲርበተበት የነበረውን መምህር ልዑለ ቃልን ‹ ‹ እንኩዋን ሲኖዶሱ ሊያወግዘው ይቅርና በጉባዔያቸው ላይ ቀርቦ እንዳልተጠየቀ እኔ አውቃለው፡፡› በማለት አንዱአለም የሠጠው ዐይን ያውጣ የሐሰት ምስክርነት እርሱን ራሱን ብቻ ሳይሆን የቆመበትንም የወንጌል ዓውደ ምህረት ጭምር በውሸት ያረከሰ እጅግ ውሸታምና ፍጹም እምነት የማይጣልበት ሣሙና የሆነ ሰው መሆኑን አረጋግጧል፡፡የሊቃውንት ጉባኤ እኮ እንዲህ ዓይነቱን  ሥራዎች እንዲሠራለት ሲኖዶሱ እራሱ ያቋቋመው ሕጋዊ ዕውቅና ያለው ጉባዔ ነው ፡፡ በውግዘትና ኑፋቄ ዙሪያ ያሉ ጉዳዮችን ቅዱስ ሲኖዶስ የሊቃውንትን ጉባዔ ሳያማክርና የውሳኔ ሃሳብ ከዚያ ሳያገኝ በግብታዊነት እንደማይወስን ዲያቆን አንዱዓለም ወይ አላወቀውም አሊያም በትክክል የተሐድሶ አራማጆችን ተግባር አምኖበት ሽፋን ለመስጠት በዓላማ የተናገረው ነው፡፡ይሁን እንጂ አንዱዓለም ችግር ያለባቸውን መምህራን በቅዱስ ሚካኤል እየጋበዘ ቢያመጣም ከራሱና ከሚመጡት መምህራን ፊት ላይ የሚነበብ ውጥረት ፤ውስጣዊ ፍርሃትና አለመረጋጋት መታየቱን በጉባዔው የሚገኙ ታዛቢ ምዕመናን ይናገራሉ ፡፡ ግልጽነት የሌለውን የድብቅ ሥራ የሚሠራ ሰው ነፍሱ የሚሠራውን ሥራ ልክ አለመሆን ስለምትነገረው ይጨነቃል ፤በውጪ ሰላመዊ ለመምሰል ይሞክራል እንጂ ውስጡ ግን ሰላም አይኖረውም፡፡

4.ዲያቆን አንዱዓለም ከስደተኛው ሲኖዶስ አብያተ ክርስቲያናት ለጉባዔ የሚጠራቸውን መምህራን ስማቸውንና የሚመጡበትን ቦታ በጉባዔው ማስታወቂያ ፖስተሮች ላይ አያወጣም፡፡ ይህን የሚያደርገው ሕዝቡ የመምህራኑን ማንነት ቀድሞ መርምሮ እንዳይረዳና ለምን ? በሚል ጥያቄ እንዳያፋጥጡት በመስጋት ነው፡፡ይሁን እንጂ አልቀረለትም፡፡ ‹ ለምሳሌ ልዑለ ቃልን ጨምሮ በወር ልዩነት በተደረጉ ሁለት ጉባኤያት የተጋበዙት መምህራን ስማቸውና የመጡበት ቦታ አልተገለጸም፡፡ ለጉባዔ የሚጋበዙ መምህራንን ለምን በፖስተር መግለጽ እንደማይፈልግ ለቤተ ክርስቲያን ተቆርቋሪ በሆኑ አንዳንድ ምእመናን ሲጠየቅ የሰጠው መልስ ‹እኛ የምንፈልገው አዋቂ መምህራንን እንጂ ታዋቂ መምህራንን አይደለም ›በማለት ተመጻድቋል፡፡ ይህ ስህተት ያለበት ንግግሩ ብዙ ትንተና ሊሠጥበት የሚያስችል ቢሆንም በዚሁ እንለፈው፡፡ አንዱአላም ግን አሁንም በንግግሩም እየሳተ ነው፡፡

ይህ ዓይነቱ የአንዱአላም አሠራር እየሔደ ያለበት ሥውር መንገድ ለአጥቢያው ምእመናን ከጥቅሙ ይልቅ እጅግ ከፍተኛ የሆነ አደጋና ጉዳት አለው፡፡

አንደኛ ሥርዓት ቤተ ክርስቲያንን በመጣስ የ3000 ዘመን ታሪክ ያላትን ኢትዮጵያ ያለችውን ቤተክርስቲያን በኢትዮጵያ የለችም እኛ አሜሪካ ይዘናት መጥተናል፡፡ ሲኖዶሷም ያለው አሜሪካ ነው፡፡ በማለት ቤተ ክርስቲያኒቱንና ሃገሪቱን የካዱ ጥቂት ጳጳሳት ለጊዜው አባባሉን ለፖለቲካ ዓላማቸው ቢጠቀሙበትም በቀኖና ቤተ ክርስቲያን ግን ይህ ተግባር ውግዘትን የሚያስከትል በመሆኑ ስለዚህ የአሜሪካው ስደተኛ ነኝ ባይ ሲኖዶስ በሕጋዊው የኢትዮጵያው ሲኖዶስ የተወገዘና የተለየ ሆኖአል ፡፡ ከዚህ አንጻር አንዱአለም የዳላስ ቅዱስ ሚካኤልን ምእመናንን ወደ ውግዘቱ በረት ለማስገባት እየሠራ መሆኑ ለምእመናኑ ትልቅ አደጋ ነው፡፡

ሁለተኛ- የስደተኛውን ሲኖዶስ ከላላ አድርገው የተሐድሶን ሥራ በሥውር የተያያዙ በአካላቸው ኦርቶዶክስ በልባቸው ግን ፕሮቴስታንት የሆኑ አያሌ መምህራነ ወንጌልና መነኮሳት በኢትዮጵያም በአሜሪካንም ውስጥ አሉ ፡፡ አንዱአለምም አሁን የተያያዘው እነዚህን መምህራን ዳላስ እያስመጡ ምእመናኑ የፕሮቴስታንትን ትምህርትና መምህራኖችን እንዲለማመዷቸው ማድረግ ነው፡፡ እስካሁን እነዚህን መምህራን ባዘጋጃቸው ሁለት ጉባኤያት በየተራ አስመጥቶ የሕዝቡን ስሜት ለመሰለል ሞክሯል፡፡

በሦስተኛው ጉባዔ ግን በፕሮቴስታንታዊ ትምህርታቸው የለየላቸውን ተሐድሶ አባ ወልደ ትንሣኤን ለማስመጣት ከቦርድ ጋር ስምምነቱን ጨርሷል፡፡ ይህም ከመስቀል በዓል ጀምረው ለሦስት ተከታታይ ወራት ያህል ስለ ስደተኛው ሲኖዶስ አስፈላጊነትና ፒያኖን በመጠቀም መዝሙርን እንዴት በቤተ ክርስቲያን ውስጥ መዘመር እንደሚቻል ከሎስ አንጀለስ ቅድስት ማሪያም ቤተ ክርስቲያን ተሞክሮአቸው አንጻር ለዳላስ ቅዱስ ሚካኤል ምዕመናን ለማስተማር እንደሚመጡ ከቅርብ ምንጮች የተገኘው መረጃ ይጠቁማል፡፡

አባ ወልደ ትንሣኤ ከዛሬ 12 ዓመታት በፊት በዳላስ ቅዱስ ሚካኤል ቤተክርስቲያን አውደ ምሕረት ላይ የእመቤታችንን ክብር የሚያጣጥል ፕሮቴስታንታዊ ትምህርት በማስተማራቸው ምክንያት በካህናትና በምዕመናን በኩል በገጠማቸው ከፍተኛ ቁጣና ተቃውሞ መሠረት ዳላስ ቅዱስ ሚካኤል ቤተ ክርስቲያን ሁለተኛ እንዳይመጡ ታግደው መቆየታቸው ይታወቃል፡፡ ጊዜ የሠጠው ቅል ድንጋይ ይሠብራል እንዲሉ › በቤተክርስቲያኒቱ ላይ እንደፈለጋቸው ለመሆንና ለመፈንጨት ጊዜ ያገኙ የቦርድ አባላት ጧፍ ይዞ እፊት እፊት ከሚመራቸው ዲያቆን አንዶአለምና ከወደፊቱ አስተማሪያቸው ከአባ ወልደ ትንሣኤ ጋር በመሆን ያለ ሕዝብ ፍላጎትና ፈቃድ ቤተክርስቲያኗን ቀስ ብለው በዘዴ ለስደተኛው ሲኖዶስ ለመስጠትና የተሐድሶ መፈንጫ ለማድረግ ነው፡፡

በተያዘው መርኃ ግብር መሠረት አባ ወልደ ትንሣኤ ከመስቀል ጀምረው እስከ ሕዳር ሚካኤል ድረስ በሁለት ርዕሰ ጉዳዮች ላይ በግልጽና በሥውር ሲያስተምሩ ይሰነብታሉ፡፡ አንደኛው የስደተኛውን ሲኖዶስ አስፈላጊነት - በግልጽ ፡፡ ሁለተኛ የቤተ ክርስቲያኒቱን የተሐድሶ ጉዳይ በሥውርና በሰም ለበስ የስብከት ዘይቤ፡፡ ከዚያ በኋላ በዲያቆን አንዱአለም በተከፈተላቸው በር ፤ በአባ ወልደ ትንሳኤ በተጠረገላቸው መንገድ ሁለት የስደተኛው ሲኖዶስ ጳጳሳት ለኅዳር ሚካኤል ክብረ በዓል ይመጣሉ ፡፡ ከዚያስ ? ከዚያማ  The mission is Over ! ማኅሌታዊው ፤ ሰባኪውና ቀዳሹ ካህን አባ ምሕረት ዘውዴስ ምን ይሆናሉ ? እርሳቸውማ በቢጫ ካርድ ስላሉ አባ ወልደ ትንሣኤ ሲመጡ በቀይ ካርድ ይሰናበታሉ፡፡ ጸባያቸውን አሳምረው ፤ቦርዱን አወድሰው፤ ጳጳሳቱንም ቄጤማ ጎዝጉዘው ከተቀበሉ ደግሞ የደብሩ አለቃ ሆነው ይሾማሉ ፡፡

ይህ እንዳይሆን እውነተኛ ነን የሚሉ የቤተ ክርስቲያኒቱ አባላት ምን ማድረግ ይጠበቅባቸዋል ?

በፊት ነበር እንጂ መጥኖ መደቆስ ፡፡

አሁን ምን ያደርጋል ድስት ጥዶ ማልቀስ፡፡

የሚለውን ተረት ምን ማለት እንደሆነ ደጋግሞ ማሰብ ነው ፡፡አንድ ችግር ከደረሰ በኋላ ከመጮህና ከመቆጨት ይልቅ አሁኑኑ ‹ሳቃጠል በቅጠል ማጥፋት ነው፡፡› ባለፈው ሐምሌ 30 2003 ስለቤተ ክርስቲያናችን ውቅታዊ ሁኔታ መነጋገር እንፈልጋለን ብለው ቦረዱን ስብሰባ እንዲጣራ ቁጥራቸው 60 የሚደርሱ የቤተ ክርስቲያኒቱ አባላት መጠየቃቸው ተሰምቷል፡፡ ይሁን እንጂ ቦርዱ ደጋፊዎቹን ወደ ስብሰባው እንዳመጡና ኮረሙ እንዳይሞላ አድርጎ ስብሰባውን ቢበትነውም ፤አባላቱ ግን እኛ አንበተንም ፤ ያለነው ተወያይተን አቋማችንን ለቦርዱ ማሳወቅ አለብን በማለት ያለውን ችግር አንስተው ተያተዋል፡፡ አሁንም ተቆረቋሪ አባላትን በማብዛትና ድምጽን ያለፍረሃት በማሰማት በቦርዱ ላይ ጫና ማድረግና ያሰበውን ዕቅዱ ሽባ ማድረግ የመጨረሻና ብቸኛ መፍትሔ ነው፡፡ ያም ካልሆን የስደተኛውን ሲኖዶስ አንቀበልም የሚሉ ምዕመናን ቁጥራቸውን አስተባብረው ሕጋዊ የንብረት ጥያቄ ለፍርድ ቤት ማቅረብ ብቻ ነው፡፡

ለማንኛውም የዳላስ ቅዱስ ሚካኤል ምእመናን የደረሰባችሁን ፈተናና ግፍ ሁሉ ቆጥሮ እግዚአብሔር የሚበጀውን መፍትሔ እንዲሰጣችሁ ሰላም ተዋሕዶ መልካም ምኞቷን ትገልጻለች፡፡