የዳላስ ቅዱስ ሚካኤል ቤተ ክርስቲያን የ1.5 ሚሊዮን ዶላር ካሣ እንዲከፍል በሕግ ተጠየቀ !

በዚህ በምንኖርበት የሰሜን አሜሪካ ግዛት በወሲብና በገንዘብ ቅሌት ምክንያት ፍርድ ቤት ቀርበው በሚሊዮን የሚቆጠር ገንዘብ እንዲከፍሉ ቅጣት የተጣለባችውና ይህን መክፈል ተስኖአቸው ቤተ ክርስቲያኖቻቸው በላያቸው ላይ የተሸጡባቸው የኒውዮርክና የካሊፎረኒያ ካቶሊክ አብያተ ክርስቲያናት ለአብነት የሚጠቀሱ ሲሆኑ በዚህና በተመሳሳይ ችግሮች ምክንያት ለገበያ የሚቀርቡ ቤተ ክርስቲያኖችም ቁጥራቸው ከዕለት ወደ ዕለት እየጨመረ መምጣቱ ክርስትናውን ግምት ውስጥ እየከተተው መምጣቱን ያመለክታል፡፡

በሜይ 2 2010 የዳለስ ቅዱስ ሚካኤል ቤተ ክርስቲያን አስተዳደር ቦርድ ኬጂ ናይን የሚል መጠሪያ ያለቸውንና በቦንብ ፈታሽ ውሾች እየታገዙ ወንጀለኞችን የሚያሳድዱ ፖሊሶችን በከፍተኛ ገንዘብ በመቅጠር በቅዳሴ ጸሎት ላይ የነበሩትን ሰላማዊ ምእመናንን ያለ ጥፋታቸው በቤተ መቅደስ ውስጥ ማስደብደቡና በተለይም ወ/ሮ ሶፊያ ዘርይሁን የተባሉትን ወጣት ወይዘሮ ከሶስት ህጻናት ልጆቻቸው ነጥለው ሰብዐዊነት በጎደለው ሁኔታ እየጎቱና እያንገላቱ እጃቸውን ወደኋላ የፊጥኝ በሰንሰለት በማሰር የአካል ጉዳት እንዳደረሱባቸው በዚያኑ ሰሞን የፎክስ ቻናል ፎር ቴሌቪዥን ክስተቱን ለአለም ይፋ ማድረጉ ይታወሳል፡፡ በዚህ መሠረት በአስተዳደር ቦርዱ ገንዘብ ያዥና ምክትል ሊቀመንበር ትዕዛዝ ሰጪነትና መሪነት በፖሊስ የደረሰባቸውን ድብደባና እንግልት ወደ ሕግ በማቅባቸው ከፍተኛ አደጋን በቤተክርስቲያኑ ህልውና ላይ ደቅኗል፡፡

ወይዘሮዋ በሃማኖትና በመልካም ሥነ ምግባራቸው የሚታወቁ ሲሆኑ ሕገ ወጥ በሆኑና የሃይማኖት ሰዎች ባልሆኑ ትቂት ግለሰቦች ቤተ ክርስቲያኑዋ በመደፈሩዋና ከመንፈሳዊ መንግዱዋ በመውጣቷ እንዲሁም የተሞከሩትን የሰላም መንገዶች ሁሉ የአስተዳደር ቦርዱ በኃይል አልቀበለም በማለቱና በኃይል ለመግዛት በመሞከሩ ምክንያት በመቆጨት አማራጭ በለሌው ሕግ አስከባሪ ኃይል ለመጠቀም ለመገደዳቸው የታዩት አሳዛኝ ሁኔታዎች ሁሉ ምስክሮች ናቸው፡፡

ሰው ብዙ ጊዜ ተመክሮና ክፉ መንገዱን እንዲተው ተደጋግሞ በሽማግሌ ተለምኖ እምቢ ካለ፤ እንኳን የሰውን የእግዚአብሔርንም ትእግስት የሚፈታተን መሆኑ የሚያጠራጥር አይሆንም ፡፡የእግዚአብሔር ቁጣና ቅጣት ደግሞ ሊቋቋሙት የማይችሉት ስለሆነ ከሁሉ የከበደ ይሆናል፡፡ የአስተዳደር ቦርዱ በሰው መብት ረገጣ ወንጀል ተከሶ የዚህን ክስ ውጤት ለመስማት ለዲሴምበር 6 2010 የተቀጠረ መሆኑ ቢታወቅም ይህ የወ/ሮ ሶፊያ ክስ ግን የድብደባ ወንጀል ክስ በመሆኑ ከአሜሪካ ሕግ በተለይም በሴቶች መብትና ክብር በኩል ያለውን ሕግ በከፍተኛ ሁኔታ የሚጋፋ ስለሆነ የቦርድ አባለቱን ብቻ ሳይሆን ቤተ ክርስቲያኒቱን ከፍተኛ ችግርና ዕዳ ውስጥ የሚጥል ጉዳይ ሆኗል፡፡ይህ ጦስ በቤተ ክርስቲያኒቱ ብቻ የተወሰነ ሳይሆን ለጋርላንድ ሲቲንም ተርፏል፡፡ በዚህ መሠረት የጋርላንድ ሲቲ ፖሊስም ለፈጸመው የድብደባ ወንጀል የሦስት ሚሊዮን ዶላር ካሣ እንዲከፍል መጠየቁን ከታመኑ ምንጮች ለማወቅ ተችሏል፡፡

የቤተክርስቲያኒቱ ችግር ባልተጠበቀ ሁኔታ እንዲህ ዓይን አፍጥጦ ጥርስ አግጥጦ በመጣበት በዚህ አስቸጋሪ ወቅት ከአስተዳደር ቦርዱና ደጋፊዎቻቸው ከሆኑት ብሎጎች የሚወጡት ዘለፋና ስድብ የተቀላቀለባቸው ጽሑፎች ከሳሽዋን ወይዘሮ የበለጠ እልህና ቁጭት ውስጥ የሚከቱ እንጂ ሰላምን ስለማያመጣ ከዚህ ለቤተክርስቲያኒቱም ሆነ ለቦርዱ ህልውና ከማይጠቅሙ አሉባልታዎች ተቆጥበው ችግሩ የሚቀረፍበትንና ስምምነቱ የሚመጣበትን መንገድ መፈለግ ይሻላል በማለት ሰላም ተዋሕዶ በዚሁ አጋጣሚ ልባዊ ምክሯን ትለግሳለች፡፡

አለበለዚያ ግን በከሳሽዋ ጠበቃ በኩል በሕግ የተጠየቀው ገንዘብ በፍርድ ቤቱ ውሳኔ ከጸና ቤተ ክርስቲያኑ በባንክ ያለው ገንዘብ በሙሉ ይወሰድበታል፡፡ ያ በቂ ሆኖ ካልተገኘ ግን ጠበቃው ሕንጻውን በላያችን ላይ ለሐራጅ ሽያጭ ለማውጣት ሙሉ መብቱ በፍርድ ቤቱ የተከበረለት ይሆናል፡፡ ያን ጊዜ ሁሉም ነገር ከእጅ ይወጣና ከላይ በምሳሌነት ያነሳናቸው የኒውዮርክና የካሊፎርኒያው አብያተክርስቲያናት እጣ በእኛ ላይ ይደርሳል፡፡

በሌላም በኩል የአስተዳደር ቦርዱ ጠበቃ ይህንን የመከላከያ ክስ ፋይል ለመክፈትና ለማንቀሳቀስ 45፣000 ዶላር ከቤተክርስቲያኑ አካውንት እንደጠየቀና እንደተሠጠው መረጃዎች የሚጠቁሙ ሲሆኑ የአስተዳደር ቦርድ እስካሁን ክሶቹን ለመከላከል ያወጣው አጠቃላይ ገንዘብ ወደ 170፣000 ዶላር መድረሱን ለማወቅ ተችሏል፡፡